Oleh: Yoelch — Nyerupe

Kisah barek-barek kampung Dusun Tanjung Timor yang ada di ujung helatan Pulau Bangka gelem di-isu ada penebok yang nek nyulik berek-berek kecet. Kabar e, berek kecet yang diculik bakal dijuel ke kota-kota besak.

Lah berape ari ni tesebar pulik berita ada penebok yang muet resah urang-urang dusun kampung Tanjung Timor. Mulai dari hiang hampai malem, hampai pulik pagi isok, dusun kampung Tanjung Timor kerase macem kampung mati. Name ge penduduk dusun, asak ada kabar penebok lah mulai, anak-anak e dak dihuro maen jaoh-jaoh dari pekarang umah.

Mang Ali, Kepale Kampung yang termasuk dukun kampung Tanjung Timor, diem-diem mulai nek nyarik taken berita isu yang muet takut warga penduduk kampung.

“Dak tahan uge rase e macem kampung mati. Asak ada kabar penebok lah mulai, kampung ni kacep dak de aben umat keluar umah, ape agik lah mulai masuk nek Maghrib hampai pagi,” kate Mang Ali bekisah ken bini e hude hemayang Maghrib hare makan malem.

“Malem ni ku nek ronda luk ngajak kawan-kawan,” nyebut ken bini e.

Bini Kepale Kampung cuma nenger bae, dak nyambung cakap ape lah. Malem itu, hude lepas hemayang Isyo, Kepale Kampung ngajak lah kawan-kawan untuk ronda ngelileng kampung Tanjung Timor yang bebatas ken laut Tanjung Timor.

Ketiko Kepale Kampung ken kawan-kawan tengah ronda, ketingok dari jaoh ada urang jemelalu keluar dari utan ngarah ke laut dusun Tanjung Timor. Pas pulik malem terang bulan, jadi bayang-bayang urang yang jemelalu nyeberang utan ke arah laut dusun Tanjung Timor nampak jelas tengah berangkut ken bende di bahu keben die yang diisik dalem karung.

“Lah dak hala agik!” kate Kepale Kampung madah ken kawan-kawan e.

“Ape mese tu, Mang?” kate kawan yang name e Umar.

“Itulah rumbong hemukel yang kate urang-urang di-isu ada penebok di kampung kite neh!”

“Hemukel ni tukang helundup timah ke luar pulau liwat laut kampung kite!” hambung Kepale Kampung yang akrab dihebut Mang Ali.

“Wooooo… rupe e ini yang dihebut penebok tu, Mang aok?”

“Berarti men di-isu ada penebok, kan berek-berek termasuk urang tue dak berani keluar umah. Jadi hemukel leluasa nek ngisi timah keben die ke perahu yang lah siap di pinggir pengkalen kite!” kate Umar pulik.