“Yeee… lah dak bulak aben!” hawet Mang Ali.

Lame Umar ken kawan-kawan e tediem bepikir. “Jadi helame ni kite dibulak urang nek muik timah ke luar pulau kite ini,” dalem ati e.

“Pacak penebok pulik jadi kambing item e gawe hemukel hekaban neh aok!” kate Umar dak abis pikir.

“Yooo Mang, kite tingok dari deket kegawen hemukel tu, Mang!” kate Umar.

“Yoo lah, tapi ikak diem-diem, jangan biseng kelak taken urang tu!” kate Mang Ali.

“Aok lah Mang, kami ngikot kate ente bae lah!” hambung Umar.

Hare ngendep pelan-pelan. Mang Ali sebagai Kepale Kampung di adep hekali, diikot dari kawan-kawan bejalan pelan nyusui rantau di tepi laut.

“Jelas kini e,” kate Mang Ali. “Tapi kite dak pacak nangkep urang itu hebab kite cuma hediket urang e. Hude e urang tu ukan ge maleng timah e, tapi hasil nambang ken meli dari urang nambang timah hebelum e dikumpel duluk. Men lah cukup banyak, baru diangkut keben die hebab men dijuel di Bangka murah harge e, mane nek mayer pajek pulik ke pemerintah. Make e dihebut Hemukel name e. Cube ikak tingok, urang tu ada henapang e yang nyago di pinggir pengkalen tu!”

“Jadi kite cukup taken bae lah ape yang helame ini dihebut penebok. Ikak ge lah taken ken ape mese e, lah ningok ken mate kepale ikak hendirik,” terang Mang Ali ken kawan-kawan.

“Men kite madah ken aparat pemerintah ge percuma, hebab nek hari baru hampai ke kota. Hane keduluk hemukel tu lari,” kate Mang Ali ngurai kisah ken kawan-kawan yang ngikot ronda malem itu. “Isok pagi kite ke kota ngelapor ke aparat pemerintah ape yang kite tingok malem ni. Jangan hampai kelak dihebut penebok agik, lah tentu ada Hemukel nek muik timah ke luar pulau kite neh.”

Hude Mang Ali ken kawan-kawan ngelapor kejadian malem itu ken aparat pemerintah, kampung dusun Tanjung Timor dak huwa agik ada kisoh penebok ken hemukel.

Jadi kite sebagai warga masyarakat kampung Tanjung Timor jangan temakan isu perihal penebok hebelum kite taken bener ape dak e. Rupe e penebok tu lah hemukel yang muet isu biar aman dak dirusoh dari urang lain.

Ape agik musim buah karet, pasti ada pulik muncul name penebok yang jadi sasaran urang-urang tue biar anak e dak nyarik buah karet untuk dipangkak hekaput utan. Rupe penebok ni cuma untuk naket-naket bae biar berek-berek dak keluar umah hampai maen ke utan-utan. Tamat

Pesan moral dari cerita ini adalah agar kita tidak mudah percaya pada isu atau rumor yang beredar sebelum mencari tahu kebenarannya sendiri, karena sering kali kabar burung disebarkan oleh pihak tak bertanggung jawab demi menutupi niat jahat serta memanfaatkan rasa takut masyarakat untuk keuntungan pribadi.