Oleh: Yoelch – Nyerupe

Jaman barek idup lah hepasang laki bini bename Mang Ali ken Cik Muna di tepi Tanjung Habang ujung helatan pulau Bangka. Untuk nyambung idup Mang Ali ken Cik Muna tiap ari nebak puket ken manceng ikan dak jaoh dari tepi pantai deket karang beling pakai perahu kecet yang cuma pacak di muat hepasang laki bini tu lah.

Suatu hari hude masang puket, Mang Ali pelang pelan ngendayung perahu e ke arah karang beling rencana nek manceng deket karang-karang. Lum hampai ke karang beling ketingok ade kapal mutor nuju ke arah perahu keben die.

Kapal mutor yang deres laju e taken-taken lah deket nyangko nek ngambik aek untuk keperluan kapal hebab biase e gelem nian kapal-kapal hingga ngambik aek di tepi Tanjung Habang deket rantau yang ade perigi usang yang aek e tawar biar deket laut.

Untung bae Mang Ali cepet ngilak perahu pakai dayung men dak ngilak nye ge belambur di tumbur dari kapal yang dak ngendur gas aben tadi. Ningok muke Cik Muna lah habang isik e ukan ge mintak maaf, tapi urang-urang di atas kapal pe ketabe ningok Cik Muna lah tepucet haban.

Kulau Cik Muna dak keruan jatak agik lah hare ngate urang di atas kapal yang nek numbur perahu keben die.

“Wooooo… dak bener agik dak keben die neh!” kate Mang Ali hare ngusap dade ningok ketingken urang-urang di kapal besak yang nek numbur perahu e.

“Ini pasti bajak laut yang dak-dak bule ape-ape di tengah laut hane!” nyebut ken bini e Cik Muna.

Lum hempet Mang Ali becakap, kayu panjang langsung nyigai talik perahu Mang Ali ken bini e. Tambah haban Cik Muna ningok ketingken urang-urang di atas kapal besak tu.

“Weeee ken nek di ape pulik dari keben die perahu kite neh?” kate Cik Muna betanyak ken Mang Ali.

Maklum lah Mang Ali hediket jelinger bilung e jadi dak hangat kedenger ape yang di hebut Cik Muna tadi.

Hude dapet talik perahu pakai kaet ken kayu, talik perahu langsung di iket keben die di belakang kapal hare nyebut ken kapten kapal e, “Tancep lah e gas, Kapten.”

Hekali gas langsung bedenyut perahu di tarek kapal besak tadi.

“Macem mane kite neh, Bang?” kate Cik Muna hare megep tangan Mang Ali.

“Teneng lah!” kate Mang Ali ngeyakin Cik Muna yang lah gupo di atas perahu yang di tarek kapal besak bajak laut.

“Urang tu nek begagil ken kite, dugo e!” kate Mang Ali hare ngeyakin bini e biar dak nue takut.

“Yakin bae, cube baco Bismillahirohmanirrohim terus menerus!” kate Mang Ali nyuroh bini e.

Dak putus nian Cik Muna terus menerus maco Bismillahirohmanirrohim yang di huro Mang Ali.

Mang Ali uge maco sholawat Nabi Muhammad SAW hare beherah dirik ken Yang Maha Kuasa minta tulung ken Penguasa Alam Semesta langet ken bumi. Dak lame ade karoh dari kapal minta tulung yang tadi ketabe kini beguleng-guleng nahan hakit perut hemue.

“Puter dak…!” kate Mang Ali nyurak hare nunjuk ke kapal.

Gas mesin kapal langsung kendur, hare nahan hakit di perut kapten kapal muter haluan ke pinggir pantai. Lah hampai pinggir pantai cepet-cepet Mang Ali ngeluncat macem terbeng ke kapal bajak laut tadi.

Nue cigak ken Mang Ali yang ngeluncat ke kapal, urang-urang di kapal pulik yang haban isik e. Rupe dalem kapal tu ade lime urang tengah beguleng nahan hakit perut bae.